Ўзбекистон Ташқи меҳнат миграцияси агентлиги матбуот котиби Ортиқхўжа Норовники деб айтилган телеграм-каналда Канадада ишлаш бўйича эълон жойлаштирилибди. Унга кўра, Канадада бир неча турдаги меҳнат фаолияти билан фақатгина IELTS 5.0 сертификати, резюме ва паспорти бўла туриб шуғулланиш мумкин. Бу эълон шунчалик кўп савол туғдирадики, унинг ҳақиқий эканига шубҳа пайдо бўлди. Торонтода иммиграцион адвокат бўлмиш Раҳмад ака Собировда ҳам бу эълон жуда кўп савол туғдирди ва унга жавоблари йўқлигини таъкидлади. Масалан, қандай қилиб фақатгина резюме ва IELTS 5.0 билан анестезиолог бўлиш мумкин? Нафақат анестезиолог, балки оддий медсестра бўлиш учун тиббий олийгоҳни қарийб қайтадан ўқиш керак, Ўзбекистон дипломлари ўтмайди. Бундан ташқари, Канадада анестезиологнинг ойлиги постда келтирилганидан бир неча баробар юқори. Қандай қилиб Ўзбекистондаги диплом ва уларни Канада стандартларига тенглаштирувчи жараён (assessment)сиз иш таклиф қилиняпти? Энагалик, уй ишчиси, чилангар ва ҳ.к. фаолият турларининг бари Канадада сертификат олиниши, уни олиш учун эса махсус курсларда ўқиш талаб қилинади. Миграция агентлиги бу талабларни бекор қила олиш ҳуқуқига эгами? Бундай иш таклиф қилиш учун Ташқи меҳнат миграцияси агентлиги Канада ҳукумати билан шартнома имзолаганми? Агентлик Канада меҳнат қонунчилигини қандай четлаб ўтмоқчи? Ишқилиб, Ташқи меҳнат миграцияси агентлигидан ушбу саволларга жавоб кутиб қоламиз. Унгача, мен бунга ишонмадим. Ноҳақ бўлсам хурсанд бўламан. Агентлик ноҳақ эканимни исботлаб, батафсил маълумот беришини кутаман. @zambarakning_oqi