Mobiuz’ бобоси Uzdunrobita'дан арзонга кетадими? Bloomberg'нинг Ўзбекистондаги манбаларига кўра, Mobiuz бренди остида фаолият кўрсатувчи Universal Mobile Systems МЧЖнинг 100%лик давлат улуши 300 млн.долларга сотилиши мумкин. Манбалар гапираверади, дейишингиз мумкин, лекин янги даврдаги "ўзбекча хусусусийлаштириш" кейсларида нарх бичиш ва олдиндан овоза қилиб қўйиш манипуляция усулларидан ҳисобланади (овора бўлиб, талабгор бўлманглар, биз аллақачон келишиб бўлганмиз, дейишмайдику манбалар). Мўлжал қилинган 300 млн.доллар кўпми, камми, оммавий савдолардан олдин янграган ва яна кимсан Bloomberg'га сиздирилган ҳар қандай рақам чалғитади. Бир нарса аниқ: талабгорлар қанча кўп ва кенг бўлса, нарх шунча қиммат бўлади. Талабгорлар сонини камайтиришга уриниш эса нархни каррасига пасайтириб, коррупцион ва ёпиқ келишувлар эҳтимолини оширади. Минтақамизда яқин орада кўрсатиш мумкин бўлган энг яхши намуна бу Mobiuz'дан кичикроқ бўлган, қозоқларнинг Tele2 бренди остида ишловчи уяли алоқа компанияси Қатарнинг Power International Holding компаниясига 1 млрд. АҚШ долларига сотилгани бўлди. Узоқроққа, ёмон дейиладиган тарихга қайтсак, Mobiuz'нинг 1991 йилда туғилган бобоси Uzdunrobita МЧЖнинг 100% улуши 2004 йил (74%) ва 2007 йилдаги (26%) иккита опционда жами 371 миллион долларга сотилганди. Фақат у пайтда Uzdunrobita абонентлари ҳозиргидек 7 млн.эмас, 1,85 млн.атрофида бўлган, молиявий тушумлари ҳам каррасига кам бўлган. Ўзбекистонлик истеъмолчиларнинг Mobiuz сотувидан энг асосий манфаати бу ҳаддан ташқари олигополлашган уяли алоқа бозоримизга навбатдаги дордан қочган инвестор ёки чўнтак эмас, кучли халқаро ўйинчи кириб келиши билан боғлиқ бўлиши керак.