Илм, бизнес ва технология бир нуқтада: “InnoWeek–2025” иқтисодий ривожланишга янги суръат бермоқда Пойтахтда 9–11 октябрь кунлари бўлиб ўтган “InnoWeek–2025” ҳафталиги нафақат инновация, балки иқтисодий имкониятлар фестивали бўлди деса бўлади. САEх мажмуасида дунёнинг 30 га яқин мамлакати, 180 дан ортиқ компания ва университет вакиллари тўпланди — 15 минг квадрат метр майдонда 400 дан зиёд янги ишланма, илмий ечим ва технология намойиш этилди. 2018 йилдан буён ўтказилаётган “InnoWeek” тадбири бугунги кунда Марказий Осиёдаги илмий ва иқтисодий ҳамкорлик учун муҳим платформага айланди. Бу йилги шиор ҳам шунга муносиб — “Чегарасиз ғоялар”. Бу ибора бугунги Ўзбекистон иқтисодиётидаги янги тафаккурнинг ифодаси: инновацияга чегара йўқ, имкониятга ҳам. Ҳафталик давомида турли йўналишдаги форум ва семинарлар — стартап экотизими, инновацион ҳудудлар ва технопарклар, миллий инновацион тизимни модернизация қилиш масалалари муҳокама қилинди. Бу тадбирлар орқали ҳамкорлик лойиҳалари, сармоя киритиш имкониятлари ва янги бозорларга чиқиш йўллари кўриб чиқилди. Айниқса, “XXI аср илм-фани ва бизнесда аёллар” форуми иқтисодий ва илмий жараёнларда хотин-қизларнинг фаол иштироки, Европа дастурларидаги тенг имкониятлар масаласини кун тартибига олиб чиқди. Ушбу мавзудаги муҳокамалар халқаро инвестицион муҳитда гендер тенглиги ва инновацион ишбилармонликни ривожлантиришга қаратилган амалий таклифлар билан бойиди. “InnoWeek–2025” меҳмонлари орасида Нидерландиядан Нобел мукофоти лауреати Рик Лейманс, Япония Фан ва технологиялар агентлиги вице-президенти Моримото Шигео, шунингдек Германия, Корея ва Малайзиядан келган экспертлар иштирок этди. Улар Ўзбекистоннинг илм-фан ва бизнес интеграциясидаги фаоллигини юқори баҳоладилар. Ҳафталик доирасида 19 та B2B форматдаги музокаралар ўтказилиб, маҳаллий ва хорижий компаниялар ўртасида қатор меморандумлар имзоланди. Бу келишувлар, аввало, илмий ишланмаларни ишлаб чиқаришга жорий этиш ва инновацияларни бозорга олиб чиқиш учун амалий асос яратди.