​​Россиядан пул ўтказиш жараёни осонлашади «Агробанк» «Сбербанк» билан ҳамкорликда ишлаб чиққан янги хизмат турини таклиф қилди — “Сбербанк-Агробанк онлайн пул ўтказмалар”. Банк вакилларининг айтишларича, мазкур тизим Россиядан пул ўтказмаларини Ўзбекистонга амалга ошириш жараёнида бир қанча қулайлик яратиб беради. Мазкур тизимнинг афзаллиги ўзи нимада? Энг муҳими, Россияда истиқомат қилаётган юртдошларимиз ўз харажат ва вақтларини тежайди. Мазкур тизим 24/7 равишда хизмат кўрсатиб, автоматик равишда пулларни бир зумда ўтказишга ёрдам беради. Мазкур тизим орқали пулларни қандай жўнатса бўлади? Бу жуда осон ва қулай. Тизимга кириб, қабул қилувчининг телефон рақамини териб, керакли суммани рублда кўрсатасиз. Сиз юборган сумма телефон рақамига боғланган Humo пластик картасига онлайн ўтказилади ва сўмга конвертация қилинади. Энг муҳими, мазкур хизматдан фойдаланиш учун “Агробанк” пластик картасини очиш керак. Банк вакиллари таъкидлашича, келгусида “P2P” хизмати, яъни “Агробанк” пластик картадан “Сбербанк” картага ўтказиш хизмати ҳам жорий қилинади.