Коронавируснинг "Йота" штамми ҳақидаги хабарлар фонд ва товар бозорларига таъсир ўтказмади. Нега? Бугун эрталабдан жуда кўп ОАВлар COVID-19нинг Йота штамми аниқлангани, мазкур штаммнинг тарқалиш ва ўлимлилик даражаси жуда юқори экани ҳақида хабарлар тарқатди. Негадир жудаям сезгир бўлган фонд ва товар бозорлари бу хабарларга нисбатан бефарқдек кўринди. Кейинроқ штамм тўғрисида батафсил тушунтиришлар пайдо бўлди. Мазкур штамм ўтган йили ноябрда аниқланган. Ҳақиқатан ҳам тарқалиш тезлиги юқори бўлган, лекин кўпчилик ОАВ ёзганидек, ўлим даражаси 82% бўлмаган. Масалан, коронавируснинг турли штаммларида ўлим даражаси 1%ни ташкил этган бўлса, ушбу штамдан 1,9%гача етган. 82% деган рақам шундан пайдо бўлган. Бошқача айтганда Йотани юқтириб олганларнинг 82%и ўлади дегани эмас, Йотани юқтириб олганлар орасида ўлим даражаси бошқа штаммларни юқтирганлардан 82% юқори. Шу билан бирга Йота штамми баҳордан бошлаб ўзининг фаоллигини йўқотган. Уни аввал Альфа штамми, кейин эса ҳозирда энг ҳалокатли ҳисобланаётган Дельта штамми сиқиб чиқариб юборган. Бугунги кунда АҚШда Йота штамми билан чалинаётганлар жами шикастланишларнинг 0,1% атрофида. Шундай экан, айни даврда коронавируснинг энг хавфли ва кенг тарқалаётган штамми Дельта бўлиб қолмоқда. Бозорлардаги хавотирлар, рисклар ва волатилликлар ҳам айни шу штаммнинг бундан буён ўзини қандай тутишига боғлиқ бўлиб турипти. Шундай экан, ўзингизни асранг. Ниқоб тақинг. Масофаланинг. Вакцина олинг. Ҳозирча бундан афзалини инсоният ўйлаб топа олгани йўқ. @the_bakiroo