Арафа Мустақиллик куни арафасида мустақилликни мустаҳкамлаш ҳақида кўп гапирилади. Бу гаплар кўпчиликка ғалати туюлса-да, кейинги йилларда мустақилликни мустаҳкамлашга ростанам зарурият бор. Чунки унинг заифлашишига, мўртлашишига ва ҳатто шубҳа остига олинишига туртки бўладиган белгилар юзага чиқмоқда. Мустақиллик қандай мустаҳкамланади? Албатта биринчи навбатда замонавий Армия билан, барқарор Миллий хавфсизлик тизими билан, ташқи кучлар марказларини масофада ушлашни таъминловчи оқилона Ташқи сиёсат билан, эркин Иқтисодиёт билан. Бу ҳақда барча классик китобларда ёзилган. Саналганлар ўртасида мувозанат бузилса потенциал агрессорнинг иштаҳаси очилаверади. Шу билан бирга Мустақиллик барқарорлиги рақобатли ва очиқ сайловларда шаклланган Парламент, мустақил Суд ва Сўз эркинлиги орқали таъминланади. Кейинги 75 йилда том маънода Парламент, Суд ва Сўз эркинлиги мавжуд бирон давлат агрессияга учрагани йўқ. Мамлакат яхлитлиги ва озодлигини қуллар ёки мутега айлантирилганлар ҳимоя қилмайди. Мустақиллик фақат эркин фуқаролар учун қадрият. Қулларга айлантирилганлар учун бир Қулдорнинг иккинчи Қулдорга ўзгариши мутлақо аҳамиятсиз. Демак, Мустақилликни фақат эркин фуқаролар мустаҳкамлайди. @the_bakiroo