Президентлар ва уларнинг олқишли ўрнаклари ҳақида Кеча Токаевнинг Путиннинг аждарҳо даврасида ДНР ва ЛНРнинг тан олиниши ҳақидаги саволга хотиржамлик билан рад жавоби бергани кўп эътирофларга сабаб бўлди. Албатта бу олқишга сазовор. Лекин билиш керакки, бундай баёнот бериш қаҳрамонлик эмас, аслида бу унинг сиёсатчи ва давлат раҳбари сифатидаги вазифаси эди. Шунинг учун мен учун янада кўпроқ олқишга сазовор ҳаракат Токаевнинг "Александр Невский" орденини олишдан воз кечгани бўлди. Жуда нозик ва ҳурматга сазовор сабаб кўрсатган ҳолда бу ҳаракат амалга оширилган. Иккинчи эътиборли воқеа Грузия президенти Зурабишвили билан юз берди. Зурабишвили хоним супермаркетда бозорлик қилиб юрипти, дўкон ёпилмаган, сўзлари ёдлатилганлар қатор қилиб териб қўйилмаган. Фуқаро телефонини ёқиб олиб президентни ортидан юриб саволини бераяпти. Албатта ким учундир булар арзимас воқеликлар бўлиши мумкин. Лекин айнан шундай майда деталлар сиёсий анъаналар яратади, ўрнак ва намуналар қолдиради.