Ой охирида "очиқ баланс" эълон қилиш анъанаси яна тикландими? Кеча тунда 29 июнь банк тизими, молия ва солиқ идоралари учун иш куни (очиқ баланс) деб эълон қилинди. Охирги марта 2022 йил 30 апрелда шундай чорага қўл урилганди. Одатда, бюджетда даромад режаси бажарилмаганида, банкларнинг муаммоли кредитлари мўлжалдагидек ёпилмаганида, маъмурий топшириқ ва бюрократик схемалар бўйича молиялаштириш кўзда тутилганида очиқ баланс эълон қилиб келинган. Бу молиявий кўрсатчикларнинг ой, чорак ва ярим йиллик бошига барқарор динамикада кўрсатишга, муаммоли реалликларнинг сувалган картинасини юқорига тақдим этиб, олқиш олишга ҳам имкон берган. Содда қилиб айтганда, 1 июль кўрсаткичлари уялтирмайдиган бўлиб, "чиройликроқ" чиқиши керак. Айтиш керакки, эски эпоха бюрократиясининг барқарор қоидасига айланган, дам олиш кунларида ва ойнинг охирида эълон қилинадиган "очиқ баланс" механизмидан деярли фойдаланилмай келинаётганди. Яна шу архаик механизм қайтаётган кўринади.