Самарқандда дунёдаги иккита йирик тўқимачилик ассоциациясининг биринчи қўшма конференцияси бошланди Тадбирда 250 дан ортиқ халқаро иштирокчилар, жумладан, жаҳоннинг етакчи тўқимачилик уюшмалари, машҳур брендлар, йирик тўқимачилик ва кийим-кечак ишлаб чиқарувчи корхоналар, молиявий институтлар, савдо вакиллари, шунингдек, инновациялар ва барқарорлик соҳасидаги мутахассислар иштирок этмоқда. Хусусан, гигантлардан бўлган Cotton Analytcs, Indorama Corp., Wood Mackenzie, Reliance, SLCP, Better Work, Euratex каби ташкилот ва компаниялар вакиллари иштирок этмоқда. Бундан ташқари, Туркиянинг Zorlu Holding, SANKO Textile, Хитойнинг Cao Jia-Chang CCCT, Sycoretec CAS, Ҳиндистоннинг Jas Bedi Bedi, Американинг American & Efird LLC, Cингапурнинг Säntis Textiles, Бангладешнинг Giant Textile компаниялари етакчилари ҳам қатнашмоқда. Конференция бугунги кунда нафақат Ўзбекистоннинг тўқимачилик саноатидаги етакчи вакилларини, балки бутун дунё бўйлаб ушбу соҳанинг етакчи мутахассисларини бирлаштирган нуфузли тадбирга айланди. Бу каби кенг масштабдаги конференциянинг Ўзбекистонда ўтказилиши эса мамлакатнинг халқаро бозордаги ўрнини ҳам мустаҳкамлайди. Тадбирга мезбонликка даъвогар давлатлар қаторида Туркия, Миср, Индонезия, ҳатто, АҚШ ҳам бўлган. Тадбир Савдо-саноат палатаси ва “Ўзтўқимачиликсаноат” уюшмаси ҳамкорлигида ташкил этилди. Унда соҳадаги глобал муаммолар ва долзарб масалаларига эътибор қаратилади. Бугунги кунда тўқимачилик саноатида аҳвол оғир бўлиб турган пайтда хориж билан ҳамкорликда шу каби йиғилишлар ўтказиб, уларнинг тажрибасини ўрганиш, дунёдаги вазиятдан хабардор бўлиб туриш биз учун айни муддао. Бу орқали қандай йўл тутса фойда бўлишини ўрганишимиз мумкин.