3 ойда маҳаллий қатновларда авиачипталар 1,74 каррагача қимматлаган Энерготарифлар оширилишининг бир ойга кечиккани ҳисобига апрель ойида ойлик инфляция бироз секинлаштирилган. Ойлик инфляция 0,7%, йиллик инфляция 10,1%ни ташкил этган. Ой давомида озиқ-овқатлар 0,8%га, ноозиқ-овқатлар 0,4%га, хизматлар эса 1,0%га қимматлаган. Энерготоварлар бўйича тарифлар ошиши кечиккани билан бошқа очофат монополистлар жим туришмаган, улар вазиятдан фойдаланиб нархларни оширишда давом этишмоқда. Хусусан, ой давомида Ҳаво транспортида йўловчи ташиш хизматлари ички йўналишларда 4,9%, халқаро йўналишларда 5,3%га қимматлаган. Маълумот учун март ойида авиачипталар ички йўналишларда 3,9%га, халқаро йўналишларда 4,8%га, февраль ойида ички йўналишларда 1,6 баробарга, халқаро йўналишларда 1,9%га қимматлаганди. Яъни охирги 3 ойда маҳаллий қатновларда авиачипталар 1,74 каррагача қимматлаган. Рақобат қўмитаси ўзбекистонликларни очиқчасига талаётган монополистларга қарши бирон чора кўргани ё бирон сўз айтганинини кўрдингизми? Мен кўрмадим. Мобиль алоқачилар ҳам авиамонополистлардан ортда қолмаяпти. Ë давлат монополияси ё олигархлар қўлида қолган уяли алоқа компаниялари тарифларини. ўтган ойда 2,5%га оширишган. Март ойида тарифлар 3,5%га ошириб олинганди. Акциз бекор қилинганига қарамай, уяли алоқа компаниялари худди келишиб олишгандек, тарифларини оширишаётгани ҳақида ёзган эдик. Қани энди истеъмолчиларни кимдир эшитса. Апрель ойида шунингдек, ўсимлик ёғи 3,2%, гўшт 1,8%гача, даволаниш хизматлари 3,0%гача қимматлаган.