Газ экспорти 15 карра ошдими ё махинациялар давом этмоқдами? Газ импорти ва экспорти Ўзбекистондаги энг ёпиқ, энг ношаффоф ва таъбир жоиз бўлса, ўзбек халқининг ҳақини талаётган муттаҳам олигархларнинг энг катта махинациялари қўлланиладиган сегмент бўлиб қолмоқда. 2025 йил апрель ва март ойлари статистикасига ишонилса, 2025 йил апрель ойида 105,4 млн.долларлик газ экспорт қилинган. 2024 йил апрель ва март ойлари статистикасидан келиб чиқилса, ўтган йилнинг апрелида атига 6,9 млн.долларлик газ экспорти қайд этилган. Бошқача айтганда, бу йилги ва ўтган йилги рақамларга ишонилса, апрель ойида газ экспорти 15 каррадан зиёдга ошган. Лекин бу йилги ҳисоботларда корректировкаланган "ўсиш суръатига" қаралса, газ экспорти 1,5 карра ўсган холос бўлиб чиқади. Яъни, орқа сана билан ўтган йили апрелда 6,9 млн.долларлик эмас, 70,9 млн.долларлик газ экспорти амалга ошгандек қилинган. Бу корректировкалар нима учун амалга оширилган, ўтган йили бутун Ўзбекистон газдан узилиб, совуқдан қақшаб ётганда газ экспортини камроқ кўрсатиш учун қилинганми? Ва ўзи бу ўзбек газими ё реэкспорт қилинаётган импорт газми? Бу газнинг нархида қанча триллион бюджет субсидияси бор? Газ экспортига оид бунақа каррасига фарқлар корректировка қилинаётганида шарҳ ва изоҳ берилиши ҳам етарли эмас. Маҳкама қўзғатилиши керак. Гап кичик рақамлар ҳақида кетмаяпти. Ўтган 4 ойда Ўзбекистоннинг барча иссиқхоналарига бутун йил давомида етадиган ёки бўлмасам, GTL заводи қишки мавсумда узлуксиз ишлашига етадиган миқдорда газ экспорт қилинган. Ўзбек гази ўзи кимни боқаяпти?