​Газ қазиб олиш кескин қисқараётганига қарамай, экспорт яна каррасига ортмоқда Апрель ойида Ўзбекистон 92,7 млн.долларлик газ экспорт қилган. Бу мартдаги экспортдан 3 каррадан кўп дегани. Тасаввур қилишингиз учун, агар минтақадаги нархларни инобатга олсак, апрелда қазиб олинган газнинг 15%дан зиёди экспортга кетган. Айни пайтда газ импорти 147,8 млн.долларгача камайган, бу рақамга импорти кескин ошаётган суюлтирилган газ ҳам кираётганини инобатга олиш керак. Босқинчи Россиянинг экспорт имкониятлари чеклангани туфайли пропанини Ўзбекистонга сотувларини кескин оширмоқда (бу ҳам шимолга навбатдаги сунъий қарамликни яратмоқда). Статқўм газ импортида табиий ва суюлтирилган газ кўрсаткичларини алоҳидалаштириб кўрсатса бўларди. Ўзбекистон ўзининг табиий газини қанақадир кулранг схемалар билан экспорт қилишда давом этаётгани, айни пайтда ҳатто суюлтирилган газни минглаб километрдан импорт қилиши иқтисодий мантиғини кимдир изоҳлаши керак. Ҳа, бундан ўртамчи пулхўрлар манфаатдор бўлиши мумкин, лекин Ўзбекистон эмас. Қайта ишламаган тақдиримиздаям, қиш учун газ омборларини тўлдириш масаласи мавжуд (қоғозда "тўлдирилган омборлар" ҳар йили декабрнинг ўртасида негадир "қовоққа" айланиб қолади). Бензин импорти статистикаси ниҳоят божхона статистикасига тўғирланган (шу сабабли апрелда манфий импорт қайд этилгандек, лекин бунга изоҳ берилмаган). Статқўм биринчи марта дизель импортини алоҳидалаштириб кўрсатган, лекин статқўм рақамлари божхона рақамларидан 1,5 карра фарқланмоқда. Олтин экспорти эса, кутганимиздек, тикланган. Олтин импорти (Афғонистон ва яна қаердандир) ҳақида гап кетганида, статқўм 9-банд, яъни каррасига ошаётган олтин импортини бу сафар кўрсатмаган (қизиқ, нима учун?). Статистикадаги ғаройибот шу билан тугамаган. 2026 йилнинг дастлабки 3 ойида 127,1 млн.доллар билан топ-10 экспорт йўналишига кирган Гонконг, апрель статистикасидан чиқариб ташланган. Унинг ўрнига 122,5 млн.долларлик экспорт билан АҚШ қўшиб қўйилган. Бу ғаройибот на мантиққа, на математикага тўғри келади. Балки Гонконгга боғланган чайқовчи ўртамчилар олдириб ташлагандир (Гонконг топ-20 савдо ҳамкорлари рўйхатидан ҳам олиб ташланган, ваҳоланки 3 ойлик кўрсаткич ўсмаган ҳолдаям рўйхатда туриши керак эди). Эслатиб ўтамиз, беғаразлик ва холислик расмий статистиканинг асосий принциплари ҳисобланади.