5 млрд.сўмлик (12 минг БҲМ) чегаравий миқдор де-факто қачондан амал қила бошлайди? Фармонга кўра, 2026 йил 1 июндан бошлаб солиқ солишнинг умумбелгиланган тартибига ўтиш учун белгиланган чегаравий миқдор базавий ҳисоблаш миқдорининг ўн икки минг баравари этиб белгиланган. Шу билан бирга, Фармон норма ва қоидалари, агар уларнинг ўзида кечроқ муддат кўрсатилмаган бўлса, дарҳол кучга кирсин деб ҳам кўрсатилган. Иқтисодиёт ва молия вазирлиги Солиқ қўмитаси билан биргаликда бир ой муддатда қонунчилик ҳужжатларига ушбу Фармондан келиб чиқадиган ўзгартириш ва қўшимчалар тўғрисида таклифларни Вазирлар Маҳкамасига киритиши белгиланган. Айни пайтда, 1 июнгача бўлган муддатда Солиқ кодексига тегишли ўзгартиришлар киритишга улгурилмаса керак (237, 294, 461, 462, 465 моддаларга ўзгартириш ва қўшимчалар талаб қилади). Устуворлигига кўра, Кодекснинг фармондан устунлиги бор. Яна бир савол, йиллик айланмаси 1 миллиард сўмгача бўлган якка тартибдаги тадбиркорлар ва ўзини ўзи банд қилган шахслар учун айланмадан олинадиган солиқ ставкаси 1 фоиз этиб белгиланган ҳуқуқий режимда қандай ўзгаришлар бўлади? Май ойи бошида тадбиркорларга солиқ имтиёзлари ва енгилликлари Солиқ кодексига киритилгунга қадар улардан фойдаланишга рухсат берилиши ҳақида таклиф янграганди. Лекин бу таклифни ҳам қонунчиликка киритишга ҳали улгурилгани йўқ.