Қазиб олиш тинимсиз пасайиб бораётгани, аҳоли истеъмолини қисқартириш режаларига қарамай, газ экспорти ошишда давом этмоқда Афсуски, газ билан боғлиқ парадоксал жараёнлар тўхтагани йўқ. Бир томонда газ қазиб олиш узлуксиз қисқариб, ҳатто аҳоли газ истеъмолини чеклаш режалари очиқчасига гапирила бошлаган, иккинчи томонда потиратиб газ экспорт қилиш ҳам тўхтамаган. Июль ойида Ўзбекистон 46,8 млн.долларлик газ экспорт қилган (йил бошидан бери 279,7 млн.доллар), бу июндагидан 1,5 карра кўп. Албатта, айтишлари мумкин, ёзда истеъмол камроқ деб, лекин омборларга газ тўлдириш билан боғлиқ вазият қандай? Яна омборларимизда 6,3 млрд.куб газ тўпладик, дея қанақадир осмон рақамлар келтирилиб, декабрдан мартгача газ тақчиллиги юз берадими? Июлда 38,3 млн.долларлик газ импорти қайд этилган (йил бошидан 1 010 млн.доллар), шунинг 19,1 млн.доллари (йил бошидан 105,4 млн.доллар) пропан импортига тўғри келган. Бошқача айтганда, июлда Ўзбекистон яна соф газ экспортчисига айланган. Бензин импорти кескин қисқарган ва 16,5 млн.долларни ташкил этган. Бензин ва пропан импорти статистикаси Божхона статистикасига мос тушган, лекин дизель импорти июлда минус 65,6 млн.доллар бўлиб чиқмоқда (балки Божхона билан корректировка қилинган). Ташқи савдо статистикасида 3 ой ўтиб, 1,3 млрд.долларлик олтин экспорти яна қайд этилган. Хизматлар экспортининг юқори ўсиш суръатлари сақланмоқда. Гонконг экспорт бўйича 6-, жами савдо бўйича 10- ҳамкоримизга айланган. Суръатлар сақланса, кейинги ойларда Гонконгга экспорт Франция ва Қозоғистонга экспортдан ўтиб кетади (Гонконгга қандай товарлар экспорт бўлаяпти? Олтин, мис?). Экспортнинг юқори ўсиш суръатлари Франция, Хитой, Қозоғистон ва Тожикистон йўналишларида давом этмоқда.