Қиш яқин: Бензин ишлаб чиқариш қулаши фонида бензин импорти сезиларли даражада камайган Статқўм маълумотларига таяниб ҳисоб-китоб қилинса, июль ойида 97,7 млн.долларлик бензин импорт қилинган. Бу ўтган йилнинг шу даврига нисбатан 11,0 млн.долларга ёки 10,1%га кам. Жорий йилнинг июнь ойига нисбатан қисқариш 7,9 млн.доллар ёки 7,5%ни ташкил этган. Кўраяпсизки, ҳаддан ташқари олигопол ва монопол бозоримизда, ҳам бензин ишлаб чиқариш, ҳам атайин шимолга боғланган бензин импорти қисқармоқда. Бунга уюштирилаётган ва мақсадли сунъий тақчилликларни қўшинг энди. Июлда 162,2 млн.долларлик газ импорти қайд этилган. Газ импортига нисбатан "амалга оширилди" деган иборани қўллаш ўринсиз бўлса керак, зеро, биз аниқ билмаймиз, четдан импорт жисмонан амалга оширилмоқдами ёки шунчаки бюджет субсидияларини ундириб, офшорларга чиқариб олиш учун воситага айланганми? Газ экспорти эса газ қазиб олиш қулаётганига қарамай, тўхтамаган ва 83,7 млн.долларга етган. Йил бошидан буён жами газ экспорти 35,7%га ошиб, 438,6 млн.долларни ташкил этган. Бу камида 2,4 млрд.куб газ дегани. Газ омборларимизда қанақа аҳвол, қанча газ йиғилди ёки пул ундириш учун қоғозга тушди, бу ҳақда шонли энергетиклардан бирон мужда ҳозирча чиқмади. Қиш яқин.