Ёқимсиз савол: Ўзбекистон қаердан ва қанча олтин импорт қилмоқда Барча ОАВлар статқўм маълумотига таяниб, рекорд миқдорда олтин экспорт қилингани (7,7 млрд.доллар) ҳақида хабар тарқатаётган бир пайтда айрим ёпиқ қолаётган ва балки ёқимсиз саволларни ҳам бериш керак, деб ўйлайман. Уруш бошлангандан кейин, Ўзбекистон нафақат олтин экспортини кескин кўпайтирди (юқори нархлар бунга яхшигина туртки бермоқда), балки турли манбаларга кўра шимолдан олтин импорт қилишни ва реэкспортни ҳам бошлаган (Уруш бошланиши билан олтин бозорида шимолликлар билан рақобат қилмаймиз тарзидаги баёнотлар янграганди). Олтин экспортининг айрим ойларда аномал тарзда ортаётгани ва Халқаро захиралар таркибининг олтин қисми ўзгаришига унча мос тушмаётгани бу ташқи белгилар холос. Бу орада Миркомил Холбоев БМТ статистикасига таяниб, Афғонистондан олтин импорт қилинаётгани ва БААга реэкспорт бўлаётгани ҳолатига эътибор қаратди. Лекин 2025 йилнинг 7- ойи ўтиб ҳам ва аввалги йиллар ҳисоботларида ҳам, Статқўм ҳисоботида на шимолдан, на жанубдан импорт қилинаётган олтин ҳақида маълумот пайдо бўлди.