Олтиннинг кескин қимматлашиши захираларимизни ошишига ёрдам бера олмаган Тезлашмаётган экспорт, секинлашмаётган импорт ва яқин орада барқарорлашиши кутилмаётган манфий савдо баланси захираларнинг емирилишини бундан кейин ҳам тўхтатиб қолиши қийин. Ноябрда олтин нархларининг кўтарилиши фонида ҳам олтин-валюта захиралари 7,6 млн.долларга, 32 896,5 млн.долларгача қисқарган. Захираларнинг олтин қисми 246,5 млн.долларга, 23 725,9 млн.долларгача камайган. Бунда олтиннинг физик ҳажми 12,0 млн.унциядан 11,6 млн.унциягача тушган. Демак, ой давомида 600-700 минг унция ёки 1,4 млрд.долларгача қийматда олтин сотилган бўлиши мумкин. Олтиннинг сотилиши захираларнинг валюта қисмини мос миқдорда кўпайтирмаган. Захираларнинг валюта қисми 237,9 млн.долларга ошиб, 8 618,2 млн.долларни ташкил этган. Олтиннинг фаол экспорти декабрдаги максимум нархлар қайд этилган кунларда ҳам давом этган бўлишини ҳисобга олсак, 2023 йилда Ўзбекистон барча даврлар учун рекорд миқдорда, жами 9 млрд.долларгача олтин сотиши мумкин.