Аэропортни қайси пудрат "қироли" қанчага таъмирлайди? Муҳим саволлар берилиши керак! Кеча Тошкент халқаро аэропортида режалаштирилаётган қурилиш ва реконструкция ишлари бўйича Uzbekistan Airports эълон қилган хабарни деярли барча ОАВлар кўчириб тарқатишди. Эътибор берсангиз, очиқланган хабарда чиройли макетларнинг сурати ва умумий маълумотлардан бошқа биронта молиявий ахборот мавжуд эмас. Афсуски, ОАВ, блогосфера ва тармоқлар кўзни шамғалат қиладиган макетларга андармон бўлиб муҳим саволларни беришни яна ёддан чиқармоқда. Биз биламизки, Uzbekistan Airports акциядорлик жамияти мақомига эга, демакки, Тошкент аэропортининг қувватини икки баробарга ошириш билан боғлиқ бўлган лойиҳанинг иқтисодий, молиявий ва тижорий тарафлари очиланиши талаб қилинадиган маълумотлар ҳисобланади. Бугун 10 декабрь ҳолатига, компаниянинг расмий сайтида ҳам, корпоратив ахбортларнинг ягона порталида ҳам бу бўйича ҳеч қандай ахборот йўқ. Балки аллақачон аэропортни қайта қуриш ва таъмирлаш бўйича бундай лойиҳаларда анъанага айланган яширин ва махфий протокол чиқиб бўлгандир. Макетлар ясаб эълон қилинмоқдами, демак аллақачон тайинланган чўнтак пудратчи ҳам мавжудга ўхшайди. Шундай қайтиб чиқмас қудуққа тушиб бўлдикки, ҳукуматдан халқаро ёки очиқ тендер ўтказилиши ҳақида гапириш ё талаб қилиш умуман маънога эга эмас. Лекин Ўзбекистонликлар билишга ҳақли, ҳукумат эса очиқлашга мажбур: Биринчидан, Тошкент аэропортини қуриш ва таъмирлаш "ташаббуси" қайси минорадан чиқмоқда ва бу қандай ҳужжат асосида амалга оширилади (Акциядорнинг бу ҳақда қарори ҳозирча йўқ). Иккинчидан, Пудратчи ким? Макетдаги қўл изларига ва ялтироқ услубларга қараганда у бегона эмас, қийматни уч карра шишириб лойиҳа ўзлаштирадиган таниқлилардан. Учинчидан, Лойиҳанинг қиймати ҳозирги босқичда қанча? Ким кафолат беради 2025 йил охиригача лойиҳа қиймати бошқа ўғри лойиҳаларда бўлгани сингари 2, 3 карра ошиб кетмаслигига? Қачондир янги Ўзбекистонда танланган пудратчи шундай ҳолатда нимагадир жавобгар бўладими? Тўртинчидан, Лойиҳани ким молиялаштиради? Ўзбекистон реалликларида бу бир неча триллион сўм дегани. Тешилиб ётган ва интизоми йўқ бюджетда пул йўқ. Silk avia ва унинг 3та самолетини текинга топширворган компаниянинг ўзида пул йўқ. Қарз олинадими? Кимдан, қаердан, қанақа шартларда? Ҳукумат кафолати биланми? Ва энг асосий бешинчи савол: бир неча триллион маблағ сарфлангандан кейин таъмирланган ва кенгайган аэропорт ўз қийматини оқлайдими? Қайтими бўладими? Неча йилда? Бу компаниянинг яқин йиллардаги рентабеллигига, операцион фаолиятига ва мажбуриятларини бажаришига қандай таъсир этади? Нега атига бир неча ой аввал ҳам шаҳар ичида жойлашгани учун ўз кенгайиш имкониятларини тугатиб бўлган деб ҳисобланган аэропортни бирданига триллионлар сарфлаб таъмирлаш қарорига келинди? Мавжуд шароитда Тошкент аэропортига муқобил бўлган аэропортларни кенгайтириш ва таъмирлаш вариантлари кўриб чиқилмадими?