Бензин ишлаб чиқариш ва нефть қазиб олишнинг қулаши газ қазиб олишнинг қулашини ҳам ортда қолдирмоқда Ёқилғи-энергетикаси статистикаси инобатга олинса, Ўзбекистонни навбатдаги мураккаб, қиммат ва дефицитли куз ва қиш энергомавсуми кутмоқда, Июль ойида Ўзбекистонда 91,4 минг тонна бензин ишлаб чиқарилган, бу ўтган йилнинг шу даврига нисбатан 24 минг тоннага кам. Охирги 2 йилда бензин ишлаб чиқариш учдан бирга қисқарган (7 ойлик қисқариш 124,3 минг тонна). Нима учун ҳали куз келмай туриб, бензин нархи осмонга ўрлагани сабабларидан бири энди тушунарли бўлса керак. Бензин ишлаб чиқариш учун етарли нефтнинг ўзи ҳам йўқ (Нефть конлари кимларга совға қилиб юборилганини эслатиш шартмасдир). Нефть қазиб олиш яна 5,2 минг тоннага, 55 минг тоннагача қисқарган. Дизель ёқилғиси ишлаб чиқариш ҳам яна камая бошлаган (таги газга бориб тақалади). Ой давомида 115,4 минг тонна дизель ишлаб чиқарилган, бу ўтган йилнинг шу даврига нисбатан 3,9 минг тонна кам. Газ қазиб олиш бир маромда эркин қуламоқда. Ўтган ойда 3 582,4 млн.куб газ қазиб олинган (-183,5 млн.куб). 7 ойда газ қазиб олишнинг қулаши 884,5 млн.кубга етган. Газ конденсати ишлаб чиқариш 7 минг тоннага, 93,2 минг тоннагача тушган. Июлда электр энергияси генерацияси ҳам кескин тушиб кетган: ой давомида 5 852,7 млн.кВт.соат электр энергияси ишлаб чиқарилган, бу ўтган йилнинг июлига нисбатан 1 218,9 млн.кВт.соат кам. Генерациянинг қулаши, не тонгки, янги станцияларда ҳам рўй берган (июлдаги узилишлар генерация етмагани ҳисобига ҳам рўй берганга ўхшайди). Статқўм ўтган ойдаги Сирдарёдаги аномалияни вилоятда янги ишга туширилган давлат хусусий шерикчилик асосида фаолият юритаётган электр энергияси ишлаб чиқарувчи корхоналар ҳажми қамровини такомиллаштириш билан изоҳлаган. Лекин электр энергияси генерацияси кескин пасайгани бу изоҳга негадир мос тушмаяпти.