Сирдарёда мўъжизавий ўсиш, газ қазишда эса йўқ 2025 йилнинг биринчи ярим йиллигида саноат ишлаб чиқаришнинг ўсиши 6,6%гача тезлашган. Бир неча вилоятлар саноат ишлаб чиқаришда ўсишни тезлаштиришга эришишган. Сирдарёда эса ҳақиқий мўъжиза содир бўлган. Май ойи якуни билан саноат ишлаб чиқаришнинг 5,5% қисқариши қайд этилган вилоятда июнь якуни билан саноат ишлаб чиқаришнинг 5,6%лик ўсиши юз берган. Йил бошидан буён вилоятда саноат ишлаб чиқаришнинг қисқариши кузатилаётган эди. Шунчаки солиштириш учун: май ойида Сирдарёда 1 473 млрд.сўмлик саноат маҳсулоти ишлаб чиқарилган бўлса, июнда бу кўрсаткич 2,8 карра сакраб, 4 072,2 млрд.сўмга етган. Статқўм Сирдарёдаги атипик ўсишнинг омилларига алоҳида тўхталмаган. Сирдарёдан фарқли ўлароқ ёқилғи энергетикасида қулаш тўхтамаган. Июнь ойида газ қазиб олиш 3 415,5 млн.кубгача қисқарган (- 147,7 млн.куб). Ярим йиллик қулаш 701 млн.кубга етган (барча иссиқхоналарга бир йилга етадиган газ). Нефть қазиб олишда ҳам шу аҳвол. Июнда 53 минг тонна ёки ўтган июнга нисбатан 6,6 минг тонна нефть қазиб олинган. Бензин ишлаб чиқариш 87,4 минг тоннагача тушиб кетган (ойлик қулаш -18,8 минг тонна, 6 ойлик қулаш 100 минг тоннадан ошган). Ишлаб чиқаришдаги қулаш аллақачон биржада акс этаётгани, куз келмай туриб нархлар сакраётгани инобатга олинса, ёғилғи борасида бизни ўтган йилдагидан ҳам оғир ва янада қиммат истиқбол кутмоқда. Газ конденсати ишлаб чиқариш 92,6 минг тоннагача қисқарган (-4,5 минг тонна). Дизель ёқилғиси ишлаб чиқариш 116,1 минг тонна (+0,7 минг тонна) миқдорида барқарорлашган. Электр энергияси генерацияси 7 975,1 млн.кВт.соатигача етган (+1 258,1 млн.Квт.соат). Ўсиш дельтасини фақат янги генерация субъектлари бермоқда. Эски станцияларда қисқариш давом этмоқда.