Озарбайжоннинг SOCAR компанияси билан маҳсулот тақсимлаш битими амалга оширилади Давлат раҳбарига кеча тақдим этилган лойиҳалардан бири Озарбайжоннинг машҳур SOCAR компанияси билан Устюртдаги конларда қидирув ўтказиб, нефть қазиб олишга оид бўлган. Энергетика вазири ва Ўзбекнефтегаз раисининг билдиришича, бир ҳафта ичида SOCAR билан маҳсулот тақсимлашга оид битим имзоланади (битимнинг тафсилотлари ҳали очиқланмаган, эҳтимолки, Газета ёзаётганидек, бу 2018 йилдаги BP иштирок этиши керак бўлган битимнинг тикланиши). Нима бўлгандаям, бу Ўзбекистон ёқилғи энергетикаси учун жуда муҳим янгилик. SOCAR билан ҳамкорлик ҳақида охирги 8 йилда жуда кўп режалар тузилган, лекин режалар амалий босқичга деярли ўтмаган эди. Жуда кўп бора таъкидлаганимиздек, Ўзбекистон ёқилғи-энергетика бозоридаги тобора кучайиб бораётган хатарларни юмшатиш, сиёсий товарга айланаётган энерготоварлар масаласида бир манбага қарамликни камайтириш учун геологоразведка, қазиш-бурғулашдан тортиб пудрат, тақсимлаш ва қайта ишлаш занжирлари ва каналларигача диверсификацияланиши керак ва бунда эркин дунёнинг глобал компаниялари билан бирга қардош озар, туркман ва қозоқ компанияларининг имкониятларидан устувор равишда фойдаланиш зарур бўлади. Айтиш керакки, Озарбайжоннинг SOCAR компанияси нафақат қазиб олишда, ёқилғи савдосида ҳам минтақада етакчи компаниялардан бири ҳисобланади. SOCAR тармоғининг Ўзбекистонда пайдо бўлиши ёқилғи бозоридаги сунъий танқислик, маъмурий узилишлар ва монопол қимматлашиш билан боғлиқ муаммоларни ечишда ҳам муҳим қадам бўлган бўларди.