80 шиптир 92 нархига етгунча қимматлайдими? Бу кетишда 80 шиптир лақабли бензин тақиқлангунча 92 бензин нархига етиб борадиган кўринади. Шиптирнинг тоннаси 10,4 млн.сўмлик янги маррани ҳам бир сакраб босиб ўтган ва бунда биржада таклиф этилаётган ҳажм (~1 650 тонна) ўзгаришсиз қолмоқда. Тили бир монополист ва олигархатнинг 80 бензин бўйича янги тактикаси кузгача ва балки йил охиригача "ётиб қолгунча, отиб қол" қабилида давом этадиган кўринади. Пировардида 80 бензин нархини 92 бензин нархигача шишириб етказгачгина, "мана энди тақиқлаймиз" дея хулоса ясаш мумкин. Бунда фокусчи энергокинначилар наздида 80 тақиқлангач ҳам бензин нархлари "ўзгармай қолган" бўлади (шартли равишда 20 сентябрга бориб, 80 шиптир тоннаси спекуляциялар билан 12,5 млн.сўмга етказилса ва тақиқланса, гўёки 12,5 млн.сўмлик 92 бензин билан солиштирганда нарх "ўзгармай қолган" бўлади, бу пайтга келиб 3 ой аввал 80 шиптир тоннаси 9,5 минг сўм бўлганини эслатишнинг ва эътирозларнинг амалий маъноси қолмайди). Антимонополия органи 80 шиптир билан боғлиқ 40 кундан бери давом этаётган спекуляцияга нисбатан ғаройиб тарзда сукунат сақлашни лозим кўрмоқда.