Шонли энергетиклар, олигархия ва монополият уддалашди: 80 шиптир 10 млн.дан қиммат! 80 шиптир лақабли бензинни кескин қимматлаштириш бўйича йил бошида белгиланган энерготўда мақсадларига йил якунланмай эришишди. Қойил, балки бунинг учун валийнеъматлардан мукофот ва бонуслар ҳам олишар. Кечаги савдоларда 80 бензиннинг тоннаси яна 142,8 минг сўмга ошиб, янги рекорд 10 031,8 минг сўмга етган. Биржада 80 шиптир таклифи 1 768 тоннагача қисқарган. Солиштириш учун, 1 йил аввал шу куни биржага 3 180 тонна бензин чиқарилган. Бир йил ичида котировкалар 38%га қимматлаганини гапирмасаям бўлади. Биржа нархи тоннасига 10 млн.сўмдан қимматлашган 80 шиптирнинг заправкалардаги нархи солиқ, сақлаш ва ташиш харажатлари ҳисобга олинса, литрига 8 500 сўмдан кам бўлмайди. Шунинг учун кимнидир қарғаш керак бўлса, ўрта ва майда тадбиркорларни эмас, олиш бошидаги ўғри ва муттаҳамларни қарғаш керак. 80 шиптир ортидан 91/92 ва юқори октанли бензин нархлари ҳам потираб ошишда давом этмоқда (лекин ўртача котировкалар эълон қилинаётгани йўқ). Агар бизда нормал давлатлардагидек антимонополия органи бўлганида тил бириктиришлари яққол кўриниб турган очофат монополия ва ўғри олигархияга маҳкама очилган ва триллионлаб жаримага тортган бўларди. Лекин олигархия ва монополият ўзбекистонликларни талаётганини жимгина қараб кузатиш маъқул, деб билинмоқда. Яна шуни ҳисобга олиш керакки, токи Ўзбекистонда энергетика, айниқса ёқилғи энергетикасига оид бузуқ бизнес модел шимоллик босқинчилар ва уларнинг шотирлари фойдасига ўзбекистонликларни танловсиз талаш устига қурилган экан, инфляция пасаймайди, кўрилаётган монетар ва фискал чоралар кор қилмайди.