​80 шиптир яна қимматламоқда: биржадаги ўйинлар таклифнинг тўлиқ монополлаштириб олинганини кўрсатади Февралда бошланган энергетик кризис билан параллел равишда асосий ёқилғига айланган 80 шиптир лақабли бензиннинг тоннаси 28 февраль куни ўртача 10 667,1 минг сўмга чиққанди. Кейин 29 февралдан бошлаб биржадаги нархлар асосан маъмурий йўллар ва бюрократик таъсир воситалари билан пасайтириб келинди. Хусусан, 6 март кунги савдоларда 80 шиптирнинг тоннаси 8 920,7 минг сўмгача туширилган. Шу куни савдоларга 7 750 тонна бензин қўйилган. Лекин 7 март куни 80 шиптир яна қимматлашни бошлаган ва бирданига 169,5 минг сўмга ортиб, тоннасига 9 090,2 минг сўмга етган. Таклиф этилган бензин ҳажми эса бирданига 2 000 тоннага 5 755 тоннагача қисқариб кетган. Бу нимадан далолат беради? Биринчидан, бензин таклифи, гарчи савдолар биржада ўтаётган бўлсада, айниқса 80 шиптир борасида, тўлиқ монополлаштирилган. Иккинчидан, тили ва чўнтаги бир очофат монополистлар ва ўғри олигархлар фақат маъмурий босим ва қўрқув туфайлигина таклифни оширишади. Босим пасайиши билан яна рентани кўпайтириш учун таклифни камайтириб нархни осмонга чиқаришга уринишаверади. Учинчидан, шу 1 ҳафталик 80 шиптир динамикаси ҳам бензин арзонлашиши учун ягона йўл рақобатни қўллаб-қувватлаш ва бозор иштирокчиларига тенг имкониятларни яратиш эканини кўрсатмоқда.