​Февралда ёқилғи ва йўлкира нархлари чўнтакларни қақшатган Энергетика кризисининг акс-садоси расмий статистикада кўрсатилмаган бўлсада, сезилган инфляция таркиби ўтган февраль истеъмолчилар учун ёқилғи ва йўлкира борасида қанчалик оғир келганини кўрсатиб қўйган. Февраль ойида сўралганларнинг 51%и нархлари юқори ўсган дея бензин ва ёқилғини қайд этган. Ростанам, февралнинг иккинчи ярмидан мартнинг биринчи ҳафтасигача ё ўзи йўқ газга суткалаб навбатда туриш ёки очофат монополистлар ва ўғри олигархларнинг аждарҳо нархларида бензин олишга мажбурлик асосий нарх белгиловчига айланди. Шунинг учун ҳам сўралганларнинг қарийб учдан бири нарх юқори ўсган дея йўлкира ва ташиш хизматларини кўрсатган. Солиштириш учун, Каримов давридаги каби чирой очаётган статистикамизга кўра, февралда йўлкира 0,5%га, бензин эса 1,1%га ошган холос. Қиммат ёқилғи ва йўлкира қурилиш моллари (сўралганларнинг 21%), кийим ва пойафзал (21%), тиббий хизматлар (16%) нархларининг ўсиши сезилмаларига ҳам таъсир ўтказган бўлиши мумкин. Энг юқори сезилган инфляция ҳудуди Тошкент шаҳри бўлиб қолмоқда (16,1%). Айнан Тошкентда 21% ва ундан юқори инфляция сезаётганлар улуши 27%ни ташкил этган. Даромадлар қирқимида 10-15 млн.сўм даромад эгаларининг инфляцион сезилмалари 14,6%гача кўтарилган. Қолган даромад гуруҳларида сезилган инфляция пасайган. Шу туфайли февраль якунлари бўйича сезилган инфляция 12,7%ни ташкил этган. Агар янглишмаётган бўлсам, бунданда пастроқ сезилган инфляция бу бўйича сўровлар амалга ошира бошлангандан буён кузатилмаган.