Ўзбекистон яна нефть мустақиллигига эришадими? Ўзбекистон-24 каналида айтилишича, Ўзбекистон Устюртдаги лойиҳалар ҳисобига йилига 5 млн.тонна нефть қазиб олиб чорак аср давомида нефтга бўлган эҳтиёжларни қопламоқчи. Socar компанияси билан имзоланган маҳсулот тақсимотига оид битимга кўра, Устюртнинг олтита платосида 100 млн тонна атрофида нефть ва 35 млрд куб метр атрофида газ конларини аниқлаш прогноз қилинмоқда. SOCAR’га ҳурмат сақлаган ва унинг Ўзбекистонга кириб келганини олқишлаган ҳолда, бу рақамлар фақат прогноз эканини таъкидлаш ва ёдда тутиш лозим, шонли энергетиклар шунчаки прогноз рақамларнинг пиар мақсадида ишлатиши биринчи марта эмас. Шунақа пиар доирасида, афсуски ғирт самарасиз ва нархи шиширилган лойиҳалар тасдиқланиб олинади (буларнинг ҳаммасини якунда истеъмолчи ва солиқ тўловчилар тўлайди, пудрат тушумлар эса Кипр ё Гонконгдаги чўнтакларга оқади). Узоққа бормайлик, 2023 йил ноябрда 2-3 йил ичида Ўзбекистон нефть мустақиллигига эришиши ваъда қилинган. Шонли энергетикларнинг пиарига асосланган пўрим репортажлар Ўзбекистон-24 каналида намойиш этилган. Ўшанда захиралари C1 тоифасидаги сланец рудаси 55 миллион тоннани ташкил этиши, келажакда кон захиралари 400 миллион тоннагача етиши мумкинлиги айтган шонлилар қани? Қани нефть? Қани мустақиллик? Мустақилликка эришиш тугул, нефть қазиб олиш тинимсиз қисқариб (700 минг тоннага тушиб қолган) шимолга қарамлик (2 млн.тоннага етган) узлуксиз ортмоқда. Шундай экан, бунақа лойиҳаларда оптимистик прогнозлар ёнида, базавий ва пессимистик прогнозлар ҳам туриши даркор. Токи ўзи йўқ хом-ашёга боғланган ва каррасига шиширилган GTL заводи ва Бойсундаги каби хатарлари инобатга олинмай ясалган лойиҳалар такрорланмасин. Мазасини кипрлик олигархлар ва уларнинг энергомалайлари кўриб, товонини ўзбек халқи тўламасин.