Ўз заправкалар тармоғини “сотворган” Ўзбекнефтегаз Socar билан заправкалар тармоғи очмоқчи Қарийб уч йил аввал 80 та ёқилғи қуйиш шохобчасини ёпиқ тарзда, сопини ўзидан чиқариб “сотворган” Ўзбекнефтегаз озар қардошларимизнинг Socar’и билан автомобилларга ёнилғи қуйиш бўйича замонавий шохобчалар тармоғини очишни режалаштирмоқда. Битимнинг бошқа биронта қўшимча тафсилотлари - янги заправкалар сони ва қиймати, ҳамкорларнинг улушдорлик нисбати маълум эмас. Маълумот учун, Socar Озарбайжондан ташқари Грузия, Туркия, Украина, Швейцария ва Европа иттифоқи бўйлаб 600 дан ортиқ ёқилғи қуйиш шохобчалари мавжуд. Ҳа, Socar қазиб олиш-у, қайта ишлаш ва сотувгача бўлган жараётларни интеграция қила олган улкан ва муваффақиятли компания. Лекин Ўзбекнефтегаз шу яқин даврларгача Socar’дан каттароқ компания бўлган. Айниқса охирги 10 йилда Socar тинимсиз ўсган бўлса, Ўзбекнефтегаз турлича схемаларда таланиб, пароканда қилиниб, тубга индирилди. Етиб келган жойимиз шуки, энг қиммат активлари, конлари, улушлари бегоналаштирилган Ўзбекнефтегаз тушумлари бўйича Socar’дан энди 19 карра кичрайган. Нега? Масалан, сабаблардан бирини тасаввур қилишингиз учун, нафақат “хусусийлаштирилган”UNG Petro, тарихдан хабари йўқларга шимолдан келганлар очгандек кўринадиган қизил, кўк, сариқ заправкалар ҳам аслида Ўзбекнефтегазники бўлган. Шу маънода, балки Ўзбекнефтегаз охирги 10-15 йилкида қўлидан чиқиб кетган шохобчаларни ўз назоратига қайтаришдан бошлар? Озар қардошлар ҳам келсин (қанча тез келишса, шунча яхши), шохобчалар очсин, танлов яратсин, рақобатни кучайтирсин. Бу ҳаракат бир манбага қарамликни камайтиришда катта қадам бўлади.