Газ қазиб олишда қулаш тўхтайдими? Июлда 3,3 млрд.куб газ қазиб олинган. Бу ўтган йилнинг шу даврига нисбатан 0,2 млрд.куб кам. Июнь ойида кунлик қазиб олиш мутлақ минимум 83,3 млн.кубга тушиб кетгандан кейин июлдаги кунлик 106,5 млн.куб хурсанд қилиши керакдек. Лекин энг асосий газ қазиб олувчи Ўзбекнефтегазнинг тўхтамаётган авариялар ва пасайиш ҳақидаги хабарларидан кўринадики, барқарорликкача ҳали бор ва статистикадаги ҳалинчаклар давом этади. Июлда яна кутилмаганда узоқ йиллардан бери биринчи марта газ конденсати қазиб олишда ўсиш кузатилган. Ой давомида 105,4 минг тонна газ-конденсат олинган — бу ўтган йилнинг шу даврига нисбатан 12,7 минг тонна кўп. Бензин ишлаб чиқариш 117,7 минг тоннага етган (+25,3 минг тонна) — қанийди, бу нархлардаям акс этса, дизель ишлаб чиқаришда эса қисқариш қайд этилган — 115,4 минг тонна (-1,9 минг тонна). Нефть (54,9 минг тонна) ва кўмир (1 млн.тонна) қазиб олиш ҳажмида ўзгаришлар бўлмаган. Июлда 8 363,6 млн.кВт.соат (+766,3 млн.кВт.соат) электр энергияси генерация қилинган. Бу очиқ маълумотлар мавжуд даврлардаги мутлақ рекорд. Саноат ишлаб чиқариш физик ҳажмининг ўсиши 7,9%ни ташкил этган, энг юқори ўсиш Жиззахда қайд этилмоқда (+12,7%).