"Ўзбекистон мустақиллигининг 35 йиллиги" Энг улуғ ва энг азиз байрамимиз шарафига чиқарилган олтин ва кумуш эсдалик тангалар тўплами айнан шундай номланган. Учта тангадан иборат коллекция Ўзбекистоннинг миллий давлатчилиги, тарихий мероси, миллий қадриятлари ва замонавий тараққиёт ғояларини ягона бадиий консепсияда акс эттиради. Коллекциядаги ҳар бир танга мустақиллик даврининг муҳим рамзлари ва қадриятларини ўзига хос композиция орқали ифодалайди. Эсдалик тангалари 999,9 асилликдаги олтин ва кумушдан зарб этилган бўлиб, ҳар бир танганинг оғирлиги 31,1 грамм, номинал қиймати эса 100 000 сўмни ташкил этади. Тангалар уч донадан иборат коллекция тўплами кўринишида, шунингдек, коллекциядаги тангалар ҳар бири алоҳида ҳолда сотувга чиқарилади. Олтин эсдалик тангаларининг дастлабки тиражи 450 дона, кумуш тангаларнинг дастлабки тиражи эса 800 донани ташкил этади. Уларнинг тиражи бозор эҳтиёжидан келиб чиқиб оширилиши мумкин.