Кичиклар ўстирилади Тадбиркорлар билан очиқ мулоқотида белгиланган вазифаларни амалга ошириш чора-тадбирлари тўғрисида Давлат раҳбарининг фармони имзоланган. Кичик ва ўрта тадбиркорликни устувор рағбатлантириш, ҳимоялаш ва бу бўйича институционал чоралар ҳужжатнинг асосий мазмуни ва мундарижасини белгилаган. Қўйилган мақсадларга эришиш учун қонунчиликка ўзгартиришлар киритилади (лойиҳалар рўйхати ва амалий тадбирлар режаси тасдиқланган). Тадбиркорликни қўллаб-қувватлаш бўйича жамоатчилик кенгаши таркиби янгиланган ва унинг таркибига йирик тадбиркорлар билан бирга кичик ва ўрта бизнес вакиллари ҳам киритилган. Жамоатчилик кенгаши таркибига қўшилган янги аъзолар қаторида эканим, албатта, жуда катта масъулият юклайди, айни пайтда, тадбиркорлик фаолиятига дахлдор норматив-ҳуқуқий ҳужжатлар лойиҳаларини кўриб чиқишда ва муҳокамаларда тенг имкониятлар, соғлом рақобат ва истеъмолчилар ҳақлари каби қадриятларни янада кўпроқ илгари суриш учун имконият пайдо бўлганидан хурсандман.