Кичик бизнесга алоҳида эътибор ва қўллов керак Йил якунида Президент ҳузурида Тадбиркорликни қўллаб-қувватлаш бўйича жамоатчилик кенгаши таркибида 9 та экспертлик гуруҳлари ташкил этилди. Эксперт гуруҳлари таркибидаги 49 аъзосидан 46 нафари тадбиркордир. Бошқача айтганда, бизнеснинг турли тармоқ, соҳа ва сегментларидаги хос муаммоларни тадбиркорларнинг ўзлари аниқлайди ва ўзлари ечимлар таклиф этади. Бу жуда тўғри қадам. Айни пайтда, экспертлик гуруҳлари таркибида кичик бизнес вакиллари йўқлиги ёки кичик бизнесга оид муаммоларни ўрганадиган ва Кенгашга очиқ айтадиган гуруҳ ташкил этилмагани бироз таажжубга солади. Ахир охирги йилларда ва айниқса 2024 йилда муаммоларнинг аксари айнан кичик бизнесга оид бўлмаяптими? Маъмурий босим ва юкламалар ҳимоятсиз кичик бизнес гарданига тушмаяптими? Кичик бизнеснинг каналлаштирилган овози ва вакиллиги йўқлиги учун қарорларда уларнинг манфаати четда қолмаяптими? Йирик бизнес эгалари, хусусан, эндиликда чемпион дейилаётган юқори вазнли тадбиркорлар ўз муаммоларини олий кабинетларга олиб чиқишни ва жойида ечишни ўрганиб олишди. Лекин бундай имконият юзминглаб кичик бизнес вакилларида йўқ. Шундай экан, кичик бизнесга алоҳида эътибор ва қўллов керак бўлади. Бу қўллов институционал ва вакиллик даражасида бўлиши керак.