Кичик бизнес уюшмаси керак(ми?) Сўнги йиллардаги кичик бизнеснинг солиқ, божхона, лицензиялаш, энергетика билан боғлиқ муаммолари жамоатчилик эътиборини тортар экан, бу муаммоларни нуқтали эмас, балки тизимли ҳал қилиш кераклиги яна бир бор аён бўлди. Президент Шавкат Мирзиёев аввал йирик бизнес вакиллари билан учрашиб, уларнинг муаммоларини эшитиб, тизимли равишда ҳал қилишга ёрдам берган бўлса, энди эътибор кичик бизнесга ҳам қаратилди. 19 март куни кичик ва ўрта бизнес вакиллари билан ўтказилган учрашувда мамлакатда Кичик бизнес уюшмаси ташкил этилиши эълон қилинди. Энди тадбиркорлар яккама-якка эмас, балки бирлашган ҳолда ўз манфаатларини ҳимоя қилади, давлат ташкилотлари билан муносабатларда ўз ҳуқуқларини ҳимоя қилиш имкониятига эга бўлади. Бундай тузилма кичик бизнес вакиллари учун муҳим платформага айланиши, уларнинг овози барча даражада эшитилишига ёрдам бериши мумкин. Бундай тажриба хорижий мамлакатларда, хусусан, Жанубий Корея, Туркия ва Европа давлатларида анча аввалдан йўлга қўйилган. Масалан, Жанубий Кореяда кичик ва ўрта бизнесни қўллаб-қувватлаш бўйича KOSME (Korea SMEs and Startups Agency) ташкилоти фаолият юритади. Ушбу агентлик орқали бизнес учун кредитлар, грантлар, экспортга чиқиш имкониятлари яратилади. Шунингдек, давлат кичик бизнес вакилларига инновацион маҳсулотлар ишлаб чиқариш учун алоҳида имтиёзлар бериб, уларни йирик компаниялар билан тенглаштиришга ҳаракат қилади. Умид қиламанки Кичик бизнес уюшмаси ҳам хориждаги аналоглари каби ўрта ва бизнес уюшмаси вакилларини манфаатларини ишончли ҳимоя қилади. Яна бир ижобий жиҳат — ушбу янги ташкил қилинган Кичик бизнес уюшмаси раҳбарлигига тажрибали тадбиркор аёл тайинлангани. Мирзалиева Камолат Куканбаевна кичик бизнес соҳасида катта тажрибага эга, "Меҳнат шуҳрати" ордени билан тақдирланган, шунингдек, "ААРОН ACADEMY KIDS" ихтисослаштирилган мактаб ва "ЧИЛЛА UYI" реабилитация маркази таъсисчиси. Бу нафақат тадбиркорлар, балки жамият учун ҳам муҳим қадам. Янги юзлар, айниқса, аёл раҳбарларнинг кўпайиши ҳар доим ижобий ўзгаришлардан далолат.