Шавкат Мирзиёев 18 август куни тадбиркорлар билан бўлиб ўтган очиқ мулоқот давомида белгиланган вазифалар ва режаларни амалга ошириш тўғрисидаги қарорга имзо чекди. Унда Президент ҳузуридаги Тадбиркорликни қўллаб-қувватлаш бўйича кенгашнинг янгиланган таркиби тасдиқланган. Қарор билан кенгаш аъзолари сони 22 нафардан 30 нафаргача кенгайтирилган. Улар орасида етакчи бизнесменларни ҳам кўриш мумкин. Кенгашнинг асосий вазифаси тадбиркорлик фаолиятини қўллаб-қувватлаш борасида амалга оширилаётган ислоҳотларнинг мазмун-моҳиятини тадбиркорларга етказиш, уларнинг ҳуқуқий маданиятини ошириш ва иқтисодий кўникмаларини шакллантиришга кўмаклашишдан иборат.