Расмий статистика электр ишлаб чиқариш қисқараётганини қайд этишда давом этмоқда Саноат ишлаб чиқариш статистикасига кўра, 2022 йил январь-июль ойларида 40 042,7 млн. КВт.соат электр ишлаб чиқарилган. Бу ўтган йилнинг шу даврига нисбатан 297,33 млн.КВт.соат камроқ дегани. Аввалроқ электр ишлаб чиқариш камаймагани, статистикада янги ИЭСлар, қуёш ва шамол станциялари генерацияси ҳисобга олинмаётган бўлиши мумкинлиги ҳақида айтилганди. Умуман олганда бу йил энергетика сегментида қазиб олишда ҳам, айрим маҳсулотлар ишлаб чиқаришда ҳам ўсиш қайд этилаётгани йўқ. Нефть, газ ва конденсат қазиб олиниши ўтган йил даражасига ета олмаётган бўлса, кўмир қазиб олишда ўсиш бироз сустлашган. Дизель ишлаб чиқариш июлда бироз ўсган, лекин январь-июль жамланма кўрсаткичлари ўтган йилдагидан анча пастлигича қолмоқда.