Августда ҳам мўъжиза рўй бермади Август ойи давомида 3 924,6 млн.куб газ қазиб олинган. Газ қазиб олиш ўтган йилнинг августига нисбатан 391 млн.кубга қисқарган. Йил бошидан ҳисоблаганда газ қазиб олиш 3 260,3 млн.кубга камайган. Ўтган ойда нефть қазиб олиш (64,3 минг тонна) 2022 йилнинг тегишли даврига нисбатан 2,9 минг тоннага, газ конденсати қазиб олиш (98,4 минг тонна) 8,5 минг тоннага қисқарган. Дизель ёқилғиси ишлаб чиқариш қисқариши ҳам рўй берган. Августда 70,1 минг тонна ёки ўтган йилнинг шу даврига нисбатан 7,2 минг тонна камроқ дизель ишлаб чиқарилган. Бу бошимизга тушган ўта қиммат кўргулик GTL завод туфайлими ёки йўқ, номаълум. Ўтган ойда кўмирни ер остида газга айлантириш орқали газ олиш бутунлай тўхтаган. Бу усулда бирон куб газ олинмаган. Яхши янгиликлар ҳам бор. Кўмир қазиб олиш тезлиги ошмоқда. Ўтган ойда янги рекорд 673,7 минг тонна ёки 2022 йилнинг тегишли ойидагидан 193,4 минг тонна кўпроқ кўмир қазиб олинган. Қишда маҳаллий кўмир масаласида, гарчи сифатига ва нархига саволлар бўлсада, муаммолар бўлмаса керак. Августда 6 466 млн.кВт.соат ёки ўтган йилнинг августига нисбатан 427,5 млн.кВт..соат кўпроқ электр генерация қилинган. Генерация ортмоқда, масала энди буни кам йўқотишларсиз истеъмолчига етказишда (25%лик йўқотишлар сақланиб қолса генерациянинг ўсишидан самара йўқ). Ўтган ойда 108 минг тонна (+1,8 минг тонна) бензин ишлаб чиқарилган. Бензин ишлаб чиқаришнинг ўсишида талабнинг табиий ўсишидан ташқари тез орада газга бўлган талабнинг бензинга кўчишини ҳам инобатга олиш керак бўлади.