Кўмир қутқариб қолармикан? Сентябрда саноат ишлаб чиқариш 5,7% (-0,1%)гача секинлашган. Газ қазиб олишнинг қисқариши янада тезлашган. Сентябрда қазиб олинган газ ҳажми 3 771 млн.кубни ташкил этган, бу ўтган йилнинг сентябрига нисбатан 426,7 млн.куб, жорий йил августга солиштирганда 153,4 млн.кубга кам. Газ қазиб олишнинг йиллик қисқариши 3 687,0 млн.кубга етган. Нефть қазиб олишнинг қисқариши ҳам тезлашиб бормоқда. Сентябрда 64,2 минг тонна нефть олинган, бу ўтган йилнинг сентябрига нисбатан 4,2 минг тонна кам. Ўтган ойда 96,8 минг тонна газ конденсати олинган, бу ўтган йилниинг тегишли даврига нисбатан 7,9 минг тоннага кам. Нефть ва газ конденсатининг қисқариши нафақат ўтган йил сентябрига, августга нисбатан ҳам рўй берган. Дизель ёқилғиси ишлаб чиқариш ўтган йилнинг сентябрига нисбатан 51,1 минг тоннага камайиб кетган. 4 млрд.долларлик GTL заводимиз ишлаяптими ё тўхтаб туриптимикан? Генерацияси узвий ўсиб келаётган электр энергиясида сентябрда қисқариш қайд этилган. Ўтган ойда 5 217,1 млн.кВт.соат ёки 106,6 млн.кВт.соат камроқ электр генерацияси амалга оширилган. Ўтган ойда тўхтаб қолган кўмирни ер остида газга айлантириш орқали газ олиш яна бошланган. Лекин олинган газ миқдори (793 минг куб) ўтган йилниинг тегишли ойига нисбатан 94,0%га кам бўлган. Энергетикадаги умумий ва чуқурлашиб бораётган негатив фонда фақат кўмир қазиб олиш фарқланиб турипти. Сентябрда августдаги рекорд янгиланган ва 685,6 минг тонна ёки ўтган йилниинг сентябрига нисбатан 43,8% кўпроқ кўмир қазиб олинган. Ишқилиб, қазиб олинаётган недр ростанам сифати ва характеристикасига кўра, қуйқум эмас, кўмир бўлиб чиқсин. Келаётган қишда энергетика балансида газ, нефть, конденсат, дизелдаги дефицитни кўмир қоплай олармикан?