Умидимиз кўмирдан Энергетик ресурслар орасида фақат кўмир қазиб олиш кескин ошган. Июль ойида 608,3 минг тонна кўмир қазиб олинган, бу ўтган йилнинг июлига нисбатан 168,5 минг тонна ёки 38,3%га кўп дегани. Мазкур ўсиш статистик аномалиями ё янги трендми кейинги ойларда янада аниқлашади. Кўмирга умид кўмир импортида ҳам намоён бўла бошлаган. Июль ойида 17 млн.долларлик, йил бошидан буён 98 млн.долларлик кўмир импорт қилинган. Йиллик ўсиш 56,6%. Лекин бошқа энергетик ресурсларни қазиб олиш масаласида аҳвол фақат ёмонлашиб бормоқда (табиий газ ҳақидаги тенденцияларга кеча тўхталдик). Хусусан, июль ойида нефть қазиб олиш 4,2 минг тоннага (64,7 минг тонна), газ конденсати қазиб олиш 3,4 минг тоннага (99,1 минг тонна) қисқарган. Қизиғи, кейинги ойларда ўсишни бошлаган - кўмирни ер остида сақлаб газ олиш ҳажми ҳам кескин пасайиб кетган. Июлда атига 4,3 млн.куб газ олинган, бу ўтган йилнинг шу давридагига (13,1 млн.куб) нисбатан 3 барабарига кам дегани. Кўмирга урғу бериш йил бошидаги режаларда ҳам яққол акс этганди. 2023 йилда 5 407 объект, бундан 2 229 боғча, 2 432 мактаб ва 749 тиббиёт муассасасида иситиш тизимлари кўмирга ўтказилиши керак. Бунинг учун ижтимоий объектларга жами қўшимча 184,5 минг тонна кўмир керак бўлади.