Энергетик сакраш 2.0 (Кўмирга қайтиш 1)
Охирги марта истеъмолчиларни газдан узиб кўмирга ўтказиш оммавий тадбирлари ўтган эпохада 2010-2013 йилларда кузатилган эди ва асосан жараён газ етказиш қийин бўлган Фарғона водийси вилоятларини қамраб олганди.
Бу сафарги кўмирга қайтиш тадбирлари бутун Республикани қамраб олиши, кўлами ва соҳаларга тааллуқлилиги бўйича олдингиларидан кескин фарқ қилади.
Тасдиқланган режаларга кўра, 2023 йилда 5 407 объект, бундан 2 229 боғча, 2 432 мактаб ва 749 тиббиёт муассасасида иситиш тизимлари кўмирга ўтказилади. Кўмирга ўтказиладиган объектларнинг энг кўп қисми Тошкент вилоятига тўғри келади. Пойтахт вилоятининг 1305 та мактаб, боғча ва тиббиёт объектлари янги мавсумни кўмир билан қарши олади. Вилоятда 900 атрофида мактаб борлиги ҳисобга олинса, 77% мактаблар кўмир билан иситишга ўтади. Вилоятлар ичида кўмирга ўтказиладиган объектларнинг энг кам сони Андижон вилоятида. Чунки вилоят 10 йиллар аввал кўмирга ўтказиб бўлинган. Демак, ижтимоий объектларга жами қўшимча 184,5 минг тонна кўмир керак бўлади.
Кўмирга ўтказиладиган кейинги сегмент 1 147та иссиқхона, 101 та ғишт заводи ва 126 та оҳак цехини ўз ичига олади. Саналган объектларни кўмирга ўтказилиши қўшимча 1 633,5 минг тонна кўмирга эҳтиёж туғдиради.
23 та цемент заводларини кўмирга ўтказиш 2023 йилда бошланиши ҳамда 2024 йилдан цемент заводлари тўлиқ кўмирга ўтказилиши қайд этилган. Рўйхатга Ўзбекистондаги энг йирик Қизимқумцементдан тортиб, Турон футбол клуби эгалик қиладиган кичик цемент заводигача қўшилган. Цемент заводларини кўмирга ўтказиш жами 3 201,7 минг тонна кўмирга қўшимча талаб яратади. Шу ўринда савол туғилади. Қандай қилиб мазасини Хитой, оғир экологик оқибатларини ватандошларимиз кўраётган янги цемент заводларини потирлатиб қуришга рухсат берилган? Янги цемент заводларига газ етказиш етказиш захираларини кимдир ҳисобга олганми? Янги цемент заводлари майли, нархи 4 млрд.долларгача шиширилган Uzbekistan GTL ҳам майли, ҳозирда қурилиши кетаётган бир неча млрд.долларлик янги газ-кимё комплексларига газ қаерда олинишини кимдир ҳисоб китоб қилганми? Газсиз улар бир уюм металлоломку!
Кўмирга қайтамиз. Демак, юқорида саналган учта йўналишда газдан кўмирга ўтиш учун жами 5 019,7 минг тонна кўмир керак бўлади. Ўзбекистон 2022 йилда жами 5 356.2 минг тонна кўмир қазиб олган. 2 400,0 минг тонна атрофида кўмир импорт қилинган. Импорт бўйича рақамлар жуда чалкаш ва қўшнилар статистикаси билан солиштирганда катта фарқликлар бор. Нима бўлганда ҳам, газдан кўмирга ўтиш режалари кўмир импортини каррасига оширмасдан туриб амалга ошмайди.