Ноябрда 173 миллион долларлик кўмир импорт қилинган Январдан октябргача жами 93,1 млн.долларлик кўмир импорт қилинган бўлса, биргина ноябрь ойининг ўзида 173 млн.долларлик кўмир импорти амалга оширилган. Кўмир импортининг мисли кўрилмаган рекорд даражада ортиши нима ва ким билан боғлиқлиги, импортни кимлар ва қайси мамлакатлардан, қанақа нархларда амалга оширилаётгани доимгидек ёпиқ масала бўлиб қолмоқда. Бутун Ўзбекистон, мактаблар, боғчалар, шифохоналар, шаҳарлардан тортиб қишлоқларгача Ангреннинг пишиб етилишига яна бир неча миллион йил керак бўлган кўмирни ишлатишга мажбур (ис газидан ўлиш оқибатлари билан). Унда импорт кўмирни ким келтирмоқда, ким ишлатмоқда?! Кўмир импорт қилаётганлар олигархияга топширилган Ангрен ва янги Ангрен ИЭСими? Унда нега электр генерацияси ошиш ўрнига катастрофик тарзда камаймоқда? Кўмир импорти учун қанча бюджет маблағлари йўналтирилмоқда? Қанча кўмир олинди, қаердан, қанақа нархларда? Шунинг эвазига қанча электр генерация қилинди? Электр генерацияси таннархи қанчага тушди? Кўмир олигархия ва уларга боғланиб қолган аёнлар учун жудаям коррупцион ёқилғи. Каррасига қимматга оласан, ёқасан, кулга айланади, ёки унданам осони — олинди дейсан, олмайсан, бир тўп кулни кўрсатасан. Миллиардлаб пул эса офшорларга оқади. Узоққа бормайлик, Порошенко даврида Украинада кўмир импорти билан боғлиқ, яқинда Мўғулистонда кўмир экспорти билан боғлиқ коррупцион можаролар миллий тарангликни яратганди. Порошенко ҳалигача тергов остида. Мўғулистоннинг собиқ раҳбари Халтмаагийн Баттулгага қатор айбловлар қўйилган. P.S. Маълумот учун, Қозоғистондаги Экибастуз кўмир бассейнидаги конларларни Eurasian Natural Resources Corporation гуруҳи назорат қилади. Гуруҳнинг асосий эгалар эса сизга нотаниш бўлмаган ажралмас учлик Машкевич, Шодиев ва Ибрагимовлардир.