Кўмир қазиб олиш "аномал" тарзда ошишда давом этмоқда Ҳудудларда ўзи жисмонан йўқ, лекин ижтимоий мақсадларда йўналтирилиши лозим бўлган кўмир учун ажратилган бюджет маблағларининг "хусусий шериклар" томонидан ҳазм қилиб юборилиши, тақсимланиши ва ўзлаштириши фонида кўмир қазиб олишнинг "аномал" тарзда ошаётгани ҳайратда қолдирмаслиги мумкин эмас. Октябрь ойида 657,2 минг тонна кўмир қазиб олинган, бу ўтган йилнинг тегишли даврига нисбатан 35,6%га кўп. Охирги ойларда анъанага айланган статистик рекорд суръати давом этса, 2023 йилда ўтган йилга нисбатан камида 1 млн.тонна кўпроқ, 6,5 млн.тонна кўмир қазиб олинади. Худди қазиб олишдаги каби кўмир импорти ҳам потираб ўсиш кўрсаткичларини намоён этмоқда. Октябрда 22,1 млн.долларлик кўмир импорти расмийлаштирилган, 10 ойда импорт қилинган кўмир ҳажми 161,2 млн.долларга етган. Бу ўтган йилги кўмир импортидан 73,2%га кўп. Қазиб олиш ва импортнинг "аномал" ўсиши аномал иссиқ келган куз-қиш мавсумида қайсидир йўсинда каналлаштирилиши ва ўзлаштирилиши керак албатта. Жисмонан йўқ кўмир учун бюджет маблағларининг ўзлаштирилиши бўйича очилган ва очилаётган маҳкама ва тергов иплари қаергача боришини олдиндан айтиш қийин. Лекин негадир параллелларда ҳаёлга 80- йиллардаги "пахта иши" ва 10- йиллардаги Украинадаги "кўмир иши" қофиялари келаверади.