Кўмир ўғриларига айланган "хусусий шериклар" ушланмоқда, давлат шериги бўлган ҳокимлар маҳкамага тортиладими? Хушнудбек мактабларни иситиш бўйича жалб қилинган "тадбиркорлар"нинг кўмир ўғриларига айланиши ортидан уларга қарши тергов ва маҳкама жараёнлари таълим муассасалари иситишда муаммога айланиши мумкинлиги ҳақида ёзмоқда. Бир қарашда тўғри, лекин ўша хусусий шерикларни танлаган ҳокимларнинг жавобгарлиги қаёқда қолади? Ахир ижтимоий соҳа объектларини иссиқлик энергияси билан таъминлаш бўйича хусусий шерикларни ҳокимлар танлашмаганмиди? Давлат шериги этиб ҳокимларнинг ўзлари белгиланмаганмиди? Мана 13 мингдан ортиқ ижтимоий соҳа объектини, уларнинг ичида энг кўпи мактаблар, кўмирга ўтказиш ва иситишни хусусий шерикларга топшириш қарори. Ташаббус кимлардан чиққанига эътибор қаратинг. Жавобгарлар ким эканини кўринг. Давлат шериги ва хусусий шерик Лойиҳалар учун ажратиладиган Давлат бюджети маблағларининг мақсадли сарфланиши учун давлат-хусусий шериклик тўғрисидаги битимга мувофиқ жавобгар эмасми? Бюджетдан кўмир учун триллионлаб пул ажратилган. Қани ўша пуллар? Кўмир қани? Кимдан олинган, қаерга ўтказилган, кимларга "тарқатилган"? Кимнинг оғзаки топшириғи ва буйруғи билан? Кўмир воситасида ўғирланган пуллар кимларнинг чўнтагига тушди, қайси давлатларга чиқиб кетди? Кўмирга қайтиш сиёсати доирасида газдан кўмирга ўтказилаётган 5 мингдан ортиқ ижтимоий соҳа объектлари, хусусан мактаблар учун ким жавобгар эди? Бир эслайлик. Нега "хусусий шериклар" ўрнига энди ўқувчилар кочегарлик қилишаяпти? Нега доим бир марталик ишлатиладиган майда ўғрилар қурбон берилиб, ўғирлик ва мунофиқлик мафкурасини кўз-кўз тажрибасига айлантирган ҳокимлар қилмишини келган жойидан давом эттираверишига йўл қўйиб берилаверади?