Электр импорти статистик ҳисобга ниҳоят қўшилган Ташқи савдо статистикаси бўйича етти ойлик кўрсаткичларга ниҳоят электр энергияси импорти қўшилган. Расмий рақамларга ишонилса, ўтган 7 ойда четдан 59 млн.долларлик электр импорт қилинган. Электр экспорти эса деярли тўхтаган. Энергетика вазири Шерзод Ходжаев ўтган ойда берган интервьюсида Тожикистондан электр импорт қилаётганимиз ва Афғонистон учун ёз ойларида биздан кўра Тожикистондан электр сотиб олиш арзонга тушишини таъкидлаганди. Дарвоқе, статистикамизда биринчи марта кўмир импорти ҳам акс этган. Етти ойда кўмир, кокс ва брикетлар импорти 62,6 млн.долларни ташкил этган. Импорт қилинган кўмир асосан четдан келган олигархларга ишончли бошқарувга бериб юборилган Ангрен ва Янги Ангрен ИЭСларида ишлатилади. Шу кунгача кўмир импорти бўйича расмий маълумотлар очиқланмай келинарди (импорт қилинаетган кўмирнинг нархлари бўйича ва фойдаланилаётган схемалар юзасидан жуда кўп саволлар бор). Ташқи савдо статистикасига оид яна бир эътиборли жиҳат экспорт йўналиши бўйича Россиянинг Хитойни қувиб ўтиши бўлган. Узоқ йиллардаги буён биринчи марта экспорт бўйича Россия биринчи рақамли ҳамкоримизга айланган. Мазкур ҳолат Россиянинг параллел импорт сиёсати доирасида юз бераётгани қатор саволлар туғдиради. Санкцияларни четлаб ўтишда амалга ошириладиган ҳар қандай механизмлар якунда жуда қимматга тушишини ёддан чиқармаслик зарур. https://stat.uz/uz/matbuot-markazi/qo-mita-yangiliklar/25654-o-zbekiston-respublikasi-tashqi-savdo-aylanmasi-2022-yil-yanvar-iyul