Августдаям ўзгариш бўлмади: газ қазишнинг қисқариши янада тезлашган "Август келса, яхши бўлиб кетиши"га умидлар яна оқланмади. Ўтган ойда 3 783,8 млн.куб газ қазиб олинган, бу 2023 йилнинг августига нисбатан 140,8 млн.куб кам. Бошқача айтганда, қазиб олишнинг қисқариши янада тезлашган. Йиллик қисқариш қарийб 1,5 млрд.кубга етган. Нефть қазиб олиш 60,3 минг тоннага тушган. Бу ўтган йилнинг августига нисбатан 4,0 минг тонна кам. Шонли энергетиклар ўтган йили 2-3 йилда Ўзбекистон нефть мустақиллигига эришишини ваъда этишганини буёғига тез-тез эслатиб туриш керак. Бензин ишлаб чиқариш 106,5 минг тоннагача тушган (-1,5 минг тонна). Статистикамиз электр энергияси статистикасига кичик бизнес субъектларига оид генерацияни қўша бошлаган. Натижада, ойлик генерация бирдан 11 630,4 млн.кВт.соатгача ошгандек туюлиши мумкин. Айни вақтда йиллик генерация янги ташкил топган компаниялар ҳисобига ошиб бораётганини, эски анъанавий станцияларда эса генерация қисқараётганини ҳам кўриш мумкин.