Газ қазиб олиш қисқариши фонида газ экспорти ошмоқда Июнь ойида газ қазиб олиш қисқариши давом этган. Ой давомида жами 3 700 млн.куб газ қазиб олинган, бу ўтган йилнинг тегишли даврига нисбатан 360 млн.куб ёки 8,9 фоизга камроқ дегани. Йил бошидан ҳисоблаганда газ қазиб олишнинг умумий қисқариши 9,7 фоиз атрофида қолмоқда (минус 2,5 млрд.куб). Газ қазиб олиш қисқараётгани фонида Хитойга экспорт ортмоқда. Июнь ойида Хитойга жами 85,3 млн.долларлик газ экспорт қилинган. Бу май ойига нисбатан 9%га кўп. Куз-қиш мавсуми бошланишига уч ойдан камроқ вақт қолди. Расмийларга кўра, газ омборхоналарига жами 920 млн.куб газ жамланган холос. Бу омборхоналарга жамланиши режалаштирилган газнинг 25 фоизидан сал кўпроғи дегани. Маълумот учун, фақат аҳолининг эҳтиёжларига қиш мавсумида 10 млрд.куб атрофида газ керак бўлади. Газ қазиб олиш ва газ экспорти ошиши фонида тижорий нархларда газ сотиб олишга тайер миллий ишлаб чиқарувчиларни газдан узилиши одатий ҳолга айланган. Бундан келаётган иқтисодий зарар кўламини ҳеч ким ҳисоб-китоб қилгани йўқ.