​Газ қазиб олиш қисқармоқда, газ экспорти тўхтамаган, газ импорти ошмоқда Октябрда 3 795,3 млн.куб газ қазиб олинган, бу ўтган йилнинг октябрига нисбатан 10,4%га ёки 438,3 млн.кубга камроқ. Йиллик газ қазиб олиш қисқариши 4 215,3 млн.кубга етган. Тубга қараб инишни тўхтатиб қоладиган фавқулодда омиллар пайдо бўлмаса ва ваъда қилинган мўъжиза рўй бермаса, 2023 йил якунига кўра, газ қазиб олиш 2022 йилга нисбатан 5 млрд.кубга камроқ бўлади. Қазиб олиш қисқаришига қарамай, октябрда 46,5 млн.долларлик газ экспорти расмийлаштирилган. Йил бошидан буён 458,2 млн.долларлик газ экспорти амалга оширилган. Газ импортининг пулдаги қиймати октябрда 73,8 млн.долларни ташкил этган (йил бошидан буён 561,7 млн.долларлик газ импорт қилинган). Мазкур рақамлар шартли қабул қилиниши зарур ва импорт қиймати статистикада кўрсатилганидан анча кўпроқ бўлиши мумкин, чунки масалан сентябрда 286,1 млн.долларлик газ импорти расмийлаштирилган. Бу январь-август ойларида импорт қилинганидан 1,4 баробарига кўпроқ. Яъни импорт қилинган газ расмий статистикага анча кечикиб киритилаётгани белгилари мавжуд.