Нефть қазиб олишнинг ўсиши сентябрда ҳам давом этган Нефть қазиб олиш бўйича йил/йил кесимида ўтган ойда кузатилган кичик ўсиш сентябрда бироз тезлашган. 9 ойда 587,9 минг тонна нефть қазиб олинган, бу ўтган йилнинг тегишли даврига нисбатан 6,2 минг тонна кўп. Газ ва газ конденсати ишлаб чиқариш ой/ой ва йил/йил кесимидаям қисқаришда давом этмоқда. Газ ишлаб чиқариш қисқариши фонида газ экспорти фақат ўсиб бормоқда. Демак ички истеъмол, хусусан аҳоли учун газ етказиб бериш қиш-куз мавсумида яна қисман импорт ҳисобидан қопланади. Бозор нархида газ сотиб олинади ва ўзгармай қолаётган тарифларда ички истеъмолчиларга етказилади. Триллионлаб фарқ субсидияланади. Маълумот учун, январь-август ойларида 645,9 млн.долларлик газ экспорт қилинган (ўтган йил тегишли даврига нисбатан 60,9%га кўп). Айтишингиз мумкин, эркин бозор шароитида газ импорти ҳам, газ экспорти ҳам нормал ҳодиса деб. Шундай. Лекин давлат компаниясининг экспорти бюрократик йўл билан чекланган шароитда "қўшма корхона" мақомига ўтиб олган ва махфий қарор асосида Ўзбекнефтегаздан олиниб совға қилинган конларда газ қазиб олаётган чўнтак компанияларнинг газ экспортини давом эттириши соғломликдан далолат эмас.