​​Ҳамиша ёпиқ бўлган мавзу: Хитойга газ етказувчи Asia Trans Gas МЧЖ таъсисчилари улуши ўзгармадими? Ўзбекистон охирги йилларда фақат Хитойга газ сотмоқда. Сотилаётган газнинг нархи ва шартлари ҳақида ўзбек тарафи ҳеч қачон очиқ маълумот бермаган. Ўзбек гази Хитойга Туркманистон-Хитой газ қувурлари орқали етказилади. Қувурларнинг Ўзбкистондан ўтган қисмини Asia Trans Gas МЧЖ ҚК назорат қилади. Ташкил этилган пайтда қўшма корхонанинг 50%и Ўзбекнефтегазга, қолган 50%и Хитой тарафига тегишли бўлган. Ҳозирда корхонанинг таъсисчилари улуши тўғрисида маълумот очиқ қолдирилган (скриншотга қаранг). Томонларнинг улушга эгалиги ўзгарганми, ўзбек тарафи ўз улушини Хитойларга ўтказганми, аниқ бир нарса дейиш қийин. Ўзбекистон ҳудудидан ўтадиган ва ҳар бири 529 км бўлган учта параллел трубанинг умумий узунлиги 1587 км. Шу трубалар орқали ҳар йили 40 млрд.кубгача ўзбек ва туркман гази транспортировка қилинади. Компания ташкил этилганидан буён бирон марта транзит учун нархлар тўғрисида, компаниянинг моливий ҳолати борасида маълумотлар очиқланмаган. Газ транзити энг қиммат, бозордан ташқари яна сиёсий таъсирлар воситадаги эксклюзив хизмат ҳисобланади. Масалан, ўрислар 1000 куб газни Украина ҳудудидан транзит қилиш учун ҳар 100 кмга 2,66 доллар пул тўлайди. Агарда Украина транзит тарифлари инобатга олинса, Хитойга Ўзбекистон ҳудуддидан ўтадиган газ транзити учун ҳар йили 562 млн.долларгача пул ишлаб олинаетган бўлиши мумкин.