Газ экспорти: янги жавоблар янги саволларни туғдиради Энергетика вазири Жўрабек Мирзамаҳмудовнинг газ экспорти бўйича ўзбек ва хитой статистикасидаги фарқни хитой статистикасида транзит нархи ҳам ҳисобга олингани билан тушунтириши янги саволларни юзага келтиради. Биринчидан, нега унда газ экспорти бўйича ўзбек ва хитой статистикасидаги фарқ октябрдан бошланди. Агар хитойлар статистикага транзитни ҳам қўшишган бўлса, фарқлик январдан сентябргача бўлган даврда ҳам бўлиши керак эдику. Январдан сентябргача статистикаларимиз орасида фарқ бўлмаган. Иккинчидан, майли, статистикалардаги фарқлик транзит ҳисобига дейлик. Унда ўзбек ва хитой статистикаси ўртасидаги фарқ 100 миллион доллар эмас, камида 500 миллион долларни ташкил этиши керак эди. Чунки вазир эслаб ўтган, лекин номи айланишини ҳеч ким истамайдиган ёпиқ контора Asia Trans Gas МЧЖ ҚК нафақат ўзбек гази, туркман газини ҳам транспортировка қилади. Хитойга Ўзбекистон ҳудуддидан ўтадиган газ транзити учун ҳар йили 562 млн.долларгача ташкил этиши мумкинлиги ҳақида аввал ҳам ёзганмиз. Учинчидан, газ экспорти тўхтатилгани расмийлар, хусусан Энергетика вазирлиги тарафидан ҳам қайта ва қайта такрорланаяпти. Лекин бу гаплар амалиётга бирон марта тўғри келгани йўқ. Агар газ экспорти тўхтатилган бўлса ва сизлар номини мантиядек такрорлайдиган Ўзтрансгаз экспортни тўхтатган бўлса, унда қайси компания газни экспорт қилаяпти? Оддий мантиқ: Ўзтрансгаз экспорти амалга оширмаётган бўлса, статистика бўйича газ экспорти қайд этилаётган бўлса, демак, кимдир экспорт қилаяптику. Ким ўша? Ҳақиқатни айтиш осон ва ёқимли, дейди Понтий Пилатнинг қаҳрли суди ва сўроғи олдига келтирилган Иэшуа Ҳа-Ноцри. Орадан 2000 йил ўтиб Ўзбекистонда ҳақиқатни айтиш шунчалик қийин ва азобли бўлиб кетдими?