​Газ бўйича ўзбек ва хитой статистикасида кескин катта фарқ юзага келган Ўзбекистондан газ экспорти ва Хитойга Ўзбекистондан газ импорти бўйича ўзаро боғлиқ статистикада сентябрь ойигача катта фарқликлар бўлмаган. Лекин октябрь ойида Ўзбекистон ва Хитой маълумотлари кескин фарқланишни бошлаган. Демак, севимли ўзбек статистикасига кўра, Ўзбекистон октябрь ойида 91,7 млн.долларлик газ экспорт қилган. Маълумот учун, Ўзбекистон фақат Хитойга газ экспорт қилиб келмоқда. Хитой статистикасига кўра, Ўзбекистондан октябрда 148 486 087 долларлик ёки 148,5 млн.долларлик газ импорт қилинган. Яъни, ўзбек статистикасида Хитойга экспорт қилинаётган газ ҳажми 1,62 баробарга камроқ кўрсатилган. Бу нима учун, тушунарсиз, балки совуқдан қақшаётган ўзбекистонликларни ғазабини келтирмаслик учунми ё газ экспортидан миллиардлар ишлаётган чўнтакларнинг илтимослари шундай бўлганми, айтиш қийин. Нима бўлгандаям, статистикада газ экспортини камайтириб кўрсатиш "газ экспорт қилмаяпмиз", "газ экспортини тўхтатдик" деган мантраларнинг давоми бўлиши мумкин. Айниқса, газ ишлаб чиқариш тобора қисқариб бораётган шароитда. P.S. Ва умуман, статистика қандай юритилиши, унинг чуқурлиги ва бойитилганлиги, универсаллиги қанақа таъминланиши лозимлигини бизникилар Хитойлардан, ҳеч қурса қирғизлардан ўрганишса ёмон бўлмасди.