​Автомобиль ва тўй каби инсон сифатини оширмайдиган харажатларга мойиллик юқорилигича қолмоқда Ўзбекистонликларнинг харажатлари таркибида инсон сифатини ва келгусидаги даромадларини оширмайдиган харажатлар юқорилиги ва келгусидаги кутилмалар ҳам пастламаётгани ташвишга солади. Масалан, 2- чоракда автомобиль сотиб олиш ва тўй билан боғлиқ харажатларга мойиллик кутилмаси 11%га етган (айрим гуруҳларда 17% ва 19%гача). Охирги йилларда дабдабали тўй, шунингдек, сотиб олингандан кейин (айниқса кредит ва қарз ҳисобига) нархи кескин пасайиб борадиган автомобиль ва телефон каби матоҳларга ружу қўйиши авж олган. Истеъмолчи танлови ва хулқ-атворини инсон сифатини оширадиган, келгусидаги даромадларини кўпайтирадиган харажатларга (таълим ва даволаниш, уй-жой) буриш, айни пайтда тўй маросимлари каби самарасиз харажатлардан воз кечишга онгли равишда етиб боришга ундаш каби мураккаб, лекин зарурий ҳаракатларни тўхтатмаслик керак.